حوزہ نیوز ایجنسی کی رپورٹ کے مطابق، قائد ملت جعفریہ پاکستان علامہ سید ساجد علی نقوی نے 25 دسمبر کو کرسمس اور بابائے قوم حضرت قائد اعظم کی ولادت پر اپنے تہنیتی پیغام میں کہا: حضرت عیسیٰ علیہ السلام کی آمد کی پوری انسانیت خصوصاً کرسمس کے موقع پر مسیحی برادری کو خصوصی طور پر مبارکباد پیش کرتے ہیں۔ مسیحی برادری کا ملک کی تشکیل کیساتھ ترقی و خوشحالی میں بڑا کلیدی کردار رہا ہے جسے فراموش نہیں کیا جا سکتا۔
انہوں نے مزید کہا: قائداعظم کے پاکستان کیلئے پوری قوم کو متحد ہو کر پرامن جدوجہد کرنا ہو گی، قائد کے افکار پر عمل پیرا ہو کر ہی پاکستان کے مستقبل کو محفوظ بنایا جا سکتا ہے۔
علامہ سید ساجد علی نقوی نے کہا: حضرت عیسیٰ علیہ السلام کی آمد کی خوشی ہر انسان کو منانا چاہیے کہ وہ اس انسان کی فلاح کیلئے اس آفاقی اور امن کے ساتھ تشریف لائے کہ جو ختمی مرتبت حضرت محمد صلی اللہ علیہ وآلہ وسلم کے ذریعہ پایہ تکمیل تک پہنچا۔
انہوں نے مزید کہا: حضرت عیسیٰ علیہ السلام کی تعلیمات کے مطابق زندگی استوار کرنا، ان کی سیرت و کردار سے رہنمائی لینا بھی تقاضائے ایمانی ہے۔
قائد ملت جعفریہ پاکستان نے بابائے قوم کے یوم ولادت پر اپنے پیغام میں کہا: جس آزاد و خودمختار مملکت کے قیام کی جدوجہد کو بانی پاکستان نے پایہ تکمیل تک پہنچایا اس کی سلامتی اور بقا کیلئے اب ریاست کیساتھ ہر فرد کو بھی اپنا مثبت کردار دا کرنا ہو گا۔ افسوس عرصہ دراز سے طبقاتی تفاوت، عدم مساوات، عدل و انصاف کا فقدان چلا آرہا ہے جس کا بنیادی سبب حکمرانوں کے غیر سنجیدہ اقدامات سمیت اپنے فرائض منصبی کو احسن طور پر انجام نہ دینا ہے۔
انہوں نے کہا: قائداعظم محمد علی جناح کے پاکستان کو داخلی طور پر مضبوط، مستحکم اور خوشحال بنانے کے لئے لازم ہے کہ قائداعظم کے افکار و تعلیمات پر مکمل عمل کیا جائے اور سسٹم کو عادلانہ اور شفاف بنایا جائے۔
آپ کا تبصرہ